Најновата анализа на Центарот за управување во автомобилската индустрија (CAM) открива големи разлики во профитабилноста меѓу светските производители на автомобили.
Според податоците за првите девет месеци од годината, просечната добивка на производителите изнесувала 1.363 евра по продадено возило, што е помалку во споредба со 1.409 евра во истиот период претходната година.
Профитабилноста на автомобилската индустрија е под сè поголем притисок. Просечната оперативна маржа паднала на 3,6 проценти, наспроти четири проценти една година претходно, а кај две третини од анализираните компании е забележан пад на добивката.
„Кога добивката опаѓа речиси шестпати побрзо од приходите, тоа е предупредувачки знак за индустријата“, изјавил директорот на CAM, Штефан Брацел. Според него, производителите мора посилно да се насочат кон иновации што носат профит и кон поефикасни деловни структури.
На врвот на листата е Мерцедес, кој остварил 4.198 евра добивка по продаден автомобил, што претставува зголемување од 31 процент. БМВ бележи пад од околу една третина во однос на претходната година, но и натаму остварува 3.059 евра по возило. Тојота и Џенерал моторс се над индустрискиот просек.
Тесла остварила 1.335 евра по автомобил, малку под просекот, додека Форд, БИД, Шевролет и Сузуки бележат добивка од 994 до 1.254 евра по продадено возило.
Кинеските производители Џили, САИЦ и Грејт Вол остваруваат околу 700 евра по автомобил. Значително послаб резултат има Стелантис, сопственик на брендовите Опел, Пежо, Фиат и Ситроен, со само 250 евра добивка по возило.
На дното на листата е Фолксваген, со само 12 евра добивка по продаден автомобил. Сепак, овој резултат треба да се разгледува во контекст на високите еднократни трошоци за преструктурирање, кои според анализата на CAM достигнале вкупно 8,7 милијарди евра.
Прилагодената профитна маржа на германскиот производител изнесувала 3,8 проценти, што укажува дека компанијата сè уште има простор за намалување на трошоците и подобрување на ефикасноста. Се очекува добивката по продаден автомобил да се зголеми во наредниот период, кога ќе се намали влијанието на еднократните трошоци.