Демократската унија за интеграција (ДУИ) вчера во Градскиот парк во Скопје го одбележа 24-годишниот јубилеј од своето основање, во присуство на бројни членови, симпатизери и поддржувачи на партијата.
На настанот присуствуваа лидерот на ДУИ, Али Ахмети, поранешниот премиер Талат Џафери, поранешниот министер за надворешни работи Бујар Османи, поранешниот министер за образование и наука Арбер Адеми и други партиски функционери.
Во своето обраќање Ахмети истакна дека ДУИ во изминатите 24 години достоинствено ги претставувала граѓаните и останала најорганизирана и најконсолидирана политичка сила во државата.
„Како што беше основана, со јасна мисија и силна визија, ДУИ продолжува да биде автентичен глас на Албанците и на сите граѓани кои веруваат во еднаквост, демократија и интеграција“, порача Ахмети.
Тој, меѓу другото, ги повика албанските политички партии да направат „пакт“ со кој во иднина победникот на изборите во албанскиот блок да ги претставува Албанците во владата.
„Почнавме од нула, со 1%, 2% од Албанците застапени во институциите, успеавме да поминеме 20%-22%, во рок од две децении, во многу тежок процес. Никогаш не се откажавме, не отстапивме од определбите што си ги поставивме. Почнавме од нула, завршивме со премиер, почнавме од нула, сега сме со претседател на Собранието и со директори и претседатели во многу институции“, рече Ахмети.
Тој додаде дека најважните достигнувања на државата се поврзани со ангажманот на ДУИ и изрази уверување дека актуелните предизвици ќе бидат надминати со единство и решителност.
Во рамки на прославата беше подготвена и роденденска торта, која ја пресече лидерот на партијата, Али Ахмети. На тортата беа поставени логото на ДУИ и бројот 24, кој ги симболизира годините од формирањето на партијата, а под нив стоеше пораката „години достоинство“.
