Во Њујорк шест јагоди се продаваат за околу 2.800 денари, а пакување од 12 достигнува цена од приближно 5.600 денари. Зад оваа луксузна понуда стои јапонскиот бренд „Оиши“, кој ги освои купувачите со јагоди од сортата Омакасе, познати по исклучителната сладост, нежната текстура и интензивната арома.
Брендот летово отвори привремена продавница на пазарот „Челзи“ во Њујорк, каде што интересот за неговите производи е толку голем што, според објавата, купувачите не прашуваат за цената.
Сортата Омакасе потекнува од јапонските Алпи, а нејзините плодови се издвојуваат по сладок вкус, речиси кремаста текстура и силна арома. Секоја јагода од највисоката класа на квалитет, наречена „Конесер грејд“, ја избира специјалист на компанијата, кој е задолжен за процена на вкусот и квалитетот. Потоа јагодите се пакуваат или се користат за подготовка на десерти што исто така се продаваат во привремената продавница.
За оние што сакаат само да ги пробаат, во понудата има и поединечни јагоди од сортата Којо, кои се посветли и нудат рамнотежа меѓу сладоста и освежителната киселост. Една јагода чини околу 560 денари, пренесува „Јутарњи лист“.
За да ја зачуваат свежината, јагодите секојдневно се доставуваат од фармите на „Оиши“ во Њу Џерси. Се препорачува да се консумираат што е можно побрзо, а најдоцна три дена по купувањето.
„Секојдневниот пат од фармата до трпезата овозможува нашите јагоди од класата ‘Конесер грејд’ да стигнат до купувачите кога вкусот, мирисот, бојата и нежната текстура им се на врвно ниво“, изјави Хироки Кога, извршен директор и коосновач на компанијата.
Јагодите се одгледуваат во затворени, технолошки напредни фарми во Њу Џерси, без употреба на пестициди. Специјализираната технологија овозможува прецизно приспособување на условите за одгледување, вклучувајќи ги температурата, влажноста и струењето на воздухот, со цел да се имитираат идеалните услови за растење во Јапонија. За природно опрашување се користат живи пчели.
Во внимателно контролирана средина се создаваат услови слични на оние во јапонските Алпи, со цел плодовите да ги задржат карактеристичната нежност, арома и сладост.
Освен што ги продава директно на купувачите, „Оиши“ ги снабдува и рестораните со Мишелинови ѕвезди. Компанијата нуди и подароци инспирирани од Јапонија, кои исто така наишле на голем интерес кај жителите на Њујорк.
