Македонската режисерка Тамара Котевска се огласи по повод двете номинации за престижните награди „Еми“ за филмот „The Tale of Silyan“, оценувајќи дека признанијата се меѓу најважните моменти во нејзината досегашна кариера.
Котевска преку објава на социјалните мрежи истакна дека двете номинации се потврда за вредноста на филмот и за работата на целиот тим кој учествувал во неговото создавање.
Филмот е номиниран во категоријата за кинематографија, за работата на Жан Дакар, како и за специјално признание за креативната вредност и општественото влијание на делото.
„Да имаш две номинации за наградите „Еми“ е еден од најважните моменти во мојата кариера и вистинска потврда за вредноста на мојот филм „The Tale of Silyan““, напиша Котевска.
Таа сподели и дека присуството на свеченоста на доделувањето на наградите било посебно искуство.
Котевска нагласи дека самите номинации и можноста филмот да биде претставен на ваков настан ги доживува како своевидна победа, која ја споделува со целиот тим.
„Искуството на свеченоста беше спектакуларно, нешто што ќе се памети. Да ги имаме овие номинации и да бидеме таму беше победа сама по себе, која ја споделивме со тим кој е моќен сам по себе“, напиша таа.
На крајот, Котевска испрати порака за нови успеси, со желба ваквите признанија да бидат само продолжение на идните проекти и достигнувања.
