Француската репрезентација обезбеди место во четвртфиналето на Светското првенство, откако со минимални 1:0 го совлада Парагвај во натпревар исполнет со цврста и груба игра. Единствениот погодок го постигна Килијан Мбапе од пенал во второто полувреме, со што „сините“ си закажаа дуел со Мароко.
По натпреварот, селекторот Дидие Дешамп откри дека бил загрижен поради честите остри стартови врз неговите фудбалери, особено кон капитенот Мбапе, па на крајот од средбата им дал посебна задача на двајца свои играчи.
„Им реков на двајца од нашите најсилни играчи да останат покрај Килијан до крајот на натпреварот, бидејќи се плашев дека ќе го соборат. Не беше лесен меч. Ги користеа сите можни средства. Тоа можеби не е фудбал што ги привлекува гледачите, но добро се бранеа. Секогаш е тешко против јужноамериканските селекции“, изјави Дешамп.
Иако Франција имаше иницијатива и поголем посед на топката, тешко создаваше шанси против дисциплинираната одбрана на Парагвај. Решавачкиот момент се случи во 70. минута, кога по прекршок врз Дезире Дуе беше досуден пенал, а Мбапе сигурно го реализираше.
Францускиот напаѓач истакна дека неговиот тим бил подготвен и за ваков тип натпревар.
„Знаевме што нè очекува. Ако треба да играме цврсто и борбено, можеме и така. Можеби мислеа дека ќе дојдеме само да играме убав фудбал, но бевме подготвени за борба. И во ваков натпревар покажавме дека сме подобар тим. Тоа е нивниот стил, а ние успеавме да го надминеме и да победиме“, изјави Мбапе.
