Германската стартап-компанија SAXON Q ги претстави првите комерцијални квантни процесори базирани на дијаманти кои ја надминаа границата од 100 физички кубити.
Станува збор за моделите SXQ128 со 128 кубити и SXQ512 со 512 кубити, што претставува еден од најзначајните исчекори кон практичната примена на квантната технологија.
За разлика од досегашните квантни компјутери, кои бараат масивни системи за ладење на температури блиску до апсолутната нула, овие процесори носат клучна новина – целосно функционираат на собна температура.
Новите процесори се дизајнирани така што можат директно да се вградат во стандардни серверски ормани, со што се елиминира потребата од системи за ладење кои чинат милиони. Покрај компактноста, уредите се напојуваат од обичен електричен приклучок и трошат до десет пати помалку електрична енергија од класичните суперкомпјутери.
Технологијата се заснова на таканаречените азотно-вакантни центри во дијамантската кристална решетка. Според инженерите, прецизноста при извршувањето на операциите достигнува дури 99,92 проценти, што овозможува изведување многу сложени алгоритми без брзо губење на квантната состојба.
Технологијата веќе не е само теоретски концепт. Претходните верзии на овие системи веќе активно ги користат Германскиот центар за воздухопловство и астронаутика (DLR) и Институтот „Фраунхофер“.
