Новак Ѓоковиќ без поголеми проблеми се пласираше во третото коло на Вимблдон, но призна дека долгото чекање пред почетокот на натпреварот со Стефанос Циципас го изнервирало.
Српскиот тенисер го совлада Гркот за околу час и половина игра, но на теренот излезе подоцна од планираното поради долгите мечеви што му претходеа.
„Долго чекавме и тоа малку ме иритираше. Повторно игравме доцна и со затворен покрив, па условите беа поинакви. Овојпат подобро се снајдов и мислам дека сервирав навистина добро, особено кога се соочував со брејк-топки“, изјави Ѓоковиќ.
Во следната рунда ќе се сретне со Французинот Артур Риндеркнеш, за кого очекува тежок предизвик.
„Цело време тренирав на отворено, а сега за првпат играв во затворени услови. Така се погоди, бидејќи претходните мечеви траеја долго. Утре ќе се посветам на закрепнување, бидејќи најважно е да ја сочувам енергијата за продолжението на турнирот. Риндеркнеш има одличен сервис и мора добро да се подготвам. Сè уште не сум целосно задоволен од мојот ритерн и од некои реакции, но продолжуваме понатаму“, порача Ѓоковиќ.
