Новак Ѓоковиќ се пласираше во четвртфиналето на Вимблдон, откако го совлада Роман Сафиулин со 3:1 во сетови, а по мечот зборуваше за својата физичка подготвеност, настапот и рекордот што го надмина на лондонската трева.
Српскиот тенисер истакна дека со текот на годините закрепнувањето станало клучен дел од неговата подготовка.
„Сега поминувам многу повеќе време во закрепнување отколку порано, затоа што моето тело го бара тоа. Не уживам во тој дел, но тоа е неопходно. Во текот на кариерата секогаш барав најдобри методи – хипербарични комори, инфрацрвена терапија, ледени бањи и многу други работи што ги користам и денес“, изјави Ѓоковиќ.
Тој призна дека не бил задоволен од својата игра против Сафиулин.
„Физички сум добро, но не уживав во мојата игра. Противникот ме притискаше и одигра одлично. Особено ми беше тешко во вториот сет. Сепак, победата е победа, дури и кога ќе дојде со неубедлива игра“, рече српскиот ас.
Со триумфот, Ѓоковиќ го надмина Роџер Федерер по бројот на победи на Вимблдон, но нагласи дека тоа не му претставува посебна мотивација.
„Воопшто не ми е приоритет да го изедначам или надминам рекордот на Федерер. Искрено, тоа за мене нема некое големо значење. Дури по претходниот меч дознав за тој податок“, истакна тој.
Осврнувајќи се на своите емотивни реакции на теренот, Ѓоковиќ рече дека не е горд кога ги покажува, но дека понекогаш тоа е дел од спортот.
„Перфекционист сум и секогаш сакам да играм на највисоко ниво и за себе и за публиката. Но, тоа не е секогаш возможно. Најважно е да продолжам понатаму и да бидам подобар во следниот натпревар“, додаде тој.
Во четвртфиналето на Вимблдон, Ѓоковиќ ќе игра против победникот од дуелот меѓу Феликс Оже-Алијасим и Алехандро Давидович Фокина.
