Новак Ѓоковиќ ја отвори дебатата за можни промени во тенисот, предлагајќи пократок формат на мечевите, но неговата идеја веднаш наиде на критики од поранешната светска тенисерка број еден, Ким Клајстерс.
Белгијката истакна дека ги разбира аргументите за модернизација на спортот, особено од аспект на телевизиските преноси и организацијата на турнирите, но смета дека скратувањето на мечевите би одзело еден од најпрепознатливите белези на тенисот.
Ѓоковиќ предложи сетовите да се играат до четири освоени гема, а при резултат 40:40 да нема предност, со цел натпреварите да бидат пократки и полесни за планирање.
„Нема ништо поубаво од меч што трае четири или пет часа. Такви натпревари не се случуваат секој ден, но токму тие остануваат запаметени“, изјави Клајстерс.
Таа потсети на легендарните пресметки на Ѓоковиќ со Роџер Федерер и Рафаел Надал, како и на неговите понови дуели со Јаник Синер, оценувајќи дека токму тие долги и исцрпувачки натпревари ја испишуваат историјата на тенисот.
Клајстерс призна дека од телевизиски и комерцијален аспект постојат аргументи во корист на пократки мечеви, бидејќи нивното времетраење е тешко да се предвиди.
„Разбирам што зборува Новак и често го слушам истото од луѓето од телевизиската индустрија. Тоа би им олеснило на многу страни што инвестираат во тенисот“, рече таа.
Сепак, поранешната четирикратна гренд слем шампионка нагласи дека е приврзаник на традиционалниот формат.
„Јас сум од старата школа и не сакам да гледам премногу промени во нашиот спорт. Токму тие долги и неизвесни мечеви на гренд слем турнирите го прават тенисот посебен“, порача Клајстерс.
