Google започна со тестирање на новата функција Gmail Live, која со помош на вештачката интелигенција Gemini ќе им овозможи на корисниците да ја пребаруваат својата електронска пошта преку гласовни команди, наместо со внесување текст.
Новата опција моментално е достапна за ограничен број корисници на Android и iOS, а доаѓа со специјална икона „Live“ во лентата за пребарување. Со нејзино активирање се отвора гласовен интерфејс преку кој корисниците можат да поставуваат прашања, како на пример, за последните нарачки, претстојните патувања или други информации од нивното сандаче.
Додека корисникот зборува, системот во реално време го претвора говорот во текст, а потоа Gemini го обработува барањето и гласно го чита одговорот. Истовремено, на екранот се прикажува и пораката од која се извлечени информациите.
Во интерфејсот се вклучени и копчиња за исклучување на микрофонот и за враќање во стандардниот приказ на Gmail.
Gmail Live е дел од пошироката стратегија на Google за воведување гласовни AI функции во своите услуги. По Gemini Live и Search Live, компанијата планира истата технологија да ја интегрира и во Google Docs и Google Keep.
Според најавите, функцијата ќе стане достапна за претплатниците на AI Pro и AI Ultra до крајот на летото, по завршувањето на тестирањето.
