Бред Пит денес е една од најпознатите холивудски ѕвезди, но пред да се пробие на големото платно не ги добивал сите улоги за кои одел на аудиции. Меѓу нив била и главната улога во култниот хорор „Phantasm II“ од 1988 година.
Филмот е продолжение на „Phantasm“ од 1979 година. Студиото не сакало А. Мајкл Болдвин повторно да го игра Мајк Пирсон, па режисерот Дон Коскарели морал да бара нов актер.
Меѓу актерите кои се појавиле на аудиција бил и тогаш младиот Бред Пит.
Години подоцна, Коскарели дознал дека Пит всушност бил еден од кандидатите за улогата. Болдвин му раскажал дека случајно се сретнал со Пит, кој му рекол дека бил на аудиција за „Phantasm II“, но не ја добил улогата.
Режисерот првично не верувал дека Пит навистина бил на аудиција. Сепак, решил да ги прегледа старите снимки од кастинзите и го пронашол доказот.
На снимката, директорката за кастинг ја отвора вратата и вели: „Дон Коскарели, запознај го Бред Пит“.
Така режисерот сфатил дека Пит навистина бил меѓу кандидатите за улогата.
„Во секој случај, очигледно, голема грешка од моја страна“, признал Коскарели, притоа нагласувајќи дека актерот кој ја добил улогата, Џејмс ЛеГрос, исто така бил одличен и подоцна изградил успешна кариера.
Во „Phantasm II“, Мајк по излегувањето од психијатриска установа повторно се здружува со Реџи за да му се спротивстави на мистериозниот Tall Man. Улогата на Мајк на крајот му припаднала на ЛеГрос, додека Болдвин се вратил во франшизата со „Phantasm III: Lord of the Dead“ во 1994 година.
Набргу по аудицијата за „Phantasm II“, Пит почнал да добива позначајни филмски улоги. Во почетокот на 1990-тите веќе се пробил како голема холивудска ѕвезда.
