Google привремено го стопираше својот програм за наградување на истражувачи кои откриваат безбедносни пропусти во софтверот со отворен код, откако компанијата се соочила со голем број автоматизирани пријави.
Програмот „Open Source Software Vulnerability Rewards Program“ е паузиран од 1 октомври, а од Google најавуваат дека нови информации за неговото продолжување ќе бидат објавени во првиот квартал од 2027 година.
Од компанијата наведуваат дека причината за одлуката е значителниот пораст на автоматизирани пријави, од кои огромното мнозинство не биле валидни.
Според пишувањето на „Tom’s Hardware“, инженерите на Google и тимовите задолжени за одржување на софтверот со отворен код биле преоптоварени со извештаи кои содржеле невалидни информации или таканаречени „халуцинации“.
Проблемот се поврзува и со пошироката загриженост во сајбер-безбедносната заедница за употребата на вештачка интелигенција при создавањето автоматизирани пријави. Претходно биле упатувани предупредувања дека несигурната содржина генерирана со вештачка интелигенција може да претставува сериозен ризик за програмите за наградување при откривање софтверски пропусти.
Од Google преку платформата X и на страницата на програмот потврдиле дека програмот е ставен во мирување, а учесниците во меѓувреме се упатуваат кон другите програми на компанијата за наградување за откривање грешки.
