Google го претстави Gemini Intelligence – нов систем базиран на вештачка интелигенција кој ќе биде интегриран во Android и ChromeOS уредите и ќе функционира како личен дигитален асистент.
Од компанијата соопштија дека системот комбинира напреден хардвер и софтвер со цел проактивно да им помага на корисниците во секојдневните задачи, притоа задржувајќи контрола врз приватноста и споделувањето на податоците.
Gemini Intelligence ќе овозможи автоматизирани AI функции, како создавање кошничка за купување од листа со намирници, резервирање термини за тренинг и пополнување формулари со податоци од поврзани апликации.
Сепак, корисниците и понатаму ќе мора да ги потврдат активностите пред системот да изврши конкретна задача, како на пример резервација на патување.
За новата линија лаптопи Googlebooks, тимот на Google DeepMind развил алатка наречена Magic Pointer – функција базирана на движења на курсорот која прикажува контекстуални предлози преку Gemini технологијата.
На пример, ако корисникот го помести курсорот над датум во електронска порака, системот може автоматски да предложи закажување состанок.
Google најави и поголем фокус на виџети, кои ќе бидат достапни на Googlebooks и Wear OS уредите. Преку алатката Create My Widget, корисниците ќе можат со AI команди да создаваат персонализирани виџети со рецепти, патувања или информации од Gmail и Calendar.
Компанијата тврди дека корисниците ќе имаат детална контрола врз Gemini Intelligence, со можност за исклучување одредени функции и избор кои податоци ќе бидат достапни за AI системот.
Gemini Intelligence најпрво ќе биде достапен на најновите Samsung Galaxy и Google Pixel телефони, а имплементацијата ќе започне летово.
Истовремено, „Гугл“ ја потврди и иницијативата Googlebooks – нова линија лаптопи која ќе биде тесно интегрирана со Android уредите.
Првите Googlebooks лаптопи ќе ги произведуваат Acer, ASUS, Dell, HP и Lenovo, а на пазарот се очекуваат оваа есен.
