Google подготвува експеримент што би можел да го промени начинот на кој се размислува за идната инфраструктура за вештачка интелигенција. Технолошкиот гигант на 1 октомври 2026 година планира да го испрати во орбитата својот прв експериментален сателит, во рамки на проектот „Санкетчер“.
Сателитот ќе биде лансиран од вселенската база Ванденберг во Калифорнија, како дел од мисијата Transporter-18 на SpaceX. Проектот се реализира во соработка со Planet Labs, а прототипот е приближно со големина на фрижидер.
Во него се вградени четири специјално дизајнирани TPU чипови на Google, односно процесори кои компанијата ги користи за тренирање и извршување на модели со вештачка интелигенција.
Главната идеја зад проектот е да се испита дали дел од идната инфраструктура за вештачка интелигенција би можела да функционира во вселената, каде што сончевата енергија е достапна во многу поголема мера отколку на Земјата.
Од Google Research наведуваат дека во соодветна орбита соларните панели можат да бидат значително попродуктивни и да произведуваат електрична енергија речиси непрекинато. На тој начин, компјутерските процеси би можеле да се извршуваат без дополнително оптоварување на електроенергетските мрежи на Земјата.
Сепак, вселенската средина носи и сериозни технички предизвици. Едногодишната мисија на прототипот, означен како MVP, треба да покаже како напредниот хардвер ќе функционира под екстремна радијација, во услови на вакуум и без класични услови за ладење какви што постојат во земните центри за податоци.
Сателитот веќе поминал низ симулации на силни вибрации што се јавуваат при лансирање, но вистинскиот тест ќе започне со неговото поставување во орбитата.
Од Google наведуваат дека прототипот располага со доволно енергија за извршување на поедноставни задачи поврзани со вештачката интелигенција директно од вселената.
Доколку октомвриската мисија биде успешна, компанијата планира во 2027 година да испрати уште два сателити. Со нив би се тестирале и ласерски оптички врски, преку кои сателитите би комуницирале меѓусебно во орбитата.
