Google побара од Судот на Европската Унија привремено да ја суспендира одлуката со која компанијата е обврзана да овозможи пристап до дел од својата база на податоци од пребарувањето за OpenAI и други конкурентски пребарувачи.
Компанијата веќе покрена судска постапка против Европската комисија поради одлуката, а сега поднесе и барање за привремена мерка пред Општиот суд во Луксембург.
Од Google велат дека ваквата мерка е неопходна поради, како што тврдат, ризикот од сериозна штета за приватноста и безбедноста на европските корисници. Компанијата смета дека споделувањето на податоците би можело да влијае врз безбедносните механизми и заштитата на личните податоци.
Европската комисија ја донесе спорната одлука во јули, со цел да им овозможи на конкурентите, особено на компаниите што развиваат алатки со вештачка интелигенција, да се натпреваруваат со Google во порамноправни услови.
Од Комисијата претходно порачаа дека при донесувањето на одлуката биле земени предвид безбедноста и интегритетот на системите, како и потребата од заштита на личните податоци на крајните корисници.
Google, сепак, смета дека наредбата носи сериозни ризици за приватноста на милиони корисници во Европа и затоа бара нејзино привремено запирање додека трае судската постапка.
