Летниот пораст на воздушниот сообраќај повторно предизвикува долги доцнења на летовите на грчките аеродроми, при што недостигот од контролори на летање, застарената авијациска опрема и ограничувањата во управувањето со воздушниот простор вршат сè поголем притисок врз авијацискиот систем на земјата., пишува Екатимерини.
Илјадници патници се соочуваат со продолжени чекања бидејќи бројот на патници расте во екот на туристичката сезона. По привременото олеснување во текот на зимските месеци, кога помалата побарувачка и намалениот број закажани летови го намалија притисокот врз системот, доцнењата повторно почнаа да се појавуваат во мај.
Во центарот на проблемот е ограничениот капацитет на системите за контрола на воздушниот сообраќај со кои управува грчката Управа за цивилно воздухопловство, во комбинација со недоволниот број контролори на летање. Дополнителни нарушувања предизвикуваат и честите дефекти на навигациската опрема, од која голем дел се темели на технологија од 1990-тите години.
Неодамнешниот дефект на радарот за приоди на Меѓународниот аеродром во Атина дополнително ги истакна овие проблеми. Поради дефектот, контролорите привремено останаа без радарски приказ, а капацитетот за прием на авиони беше намален од 28 на 24 летала на час, сè додека проблемот не беше отстранет следното утро, што влијаеше врз распоредот на летовите на најголемиот аеродром во земјата.
Според најновите податоци на Евроконтрол, Грција учествувала со 12 проценти од вкупните доцнења во европската воздушна мрежа во периодот од 15 до 21 јуни, со што се наоѓа на четвртото место меѓу најоптоварените региони. Од почетокот на летната сезона, земјата често се наоѓа меѓу петте најоптоварени воздушни простори во Европа.
Во истиот период, Грција беше и меѓу десетте најпрометни авијациски мрежи во Европа, со просечно 2.453 летови дневно. Најголем притисок трпи Атина поради големиот број летови и патници.
Надлежните институции ги разгледуваат и координацијата на временските термини за полетување и слетување, како и распределбата на сообраќајот во текот на денот. Најголемиот метеж е концентриран во одредени периоди, особено во утринските часови, кога побарувачката редовно го надминува расположливиот капацитет.
Дополнителен притисок создава и новиот Систем за влез и излез (Entry/Exit System – EES), поради кој патниците од земјите што не се членки на Европската Унија подолго чекаат на пасошка контрола. Со воведувањето на задолжителното собирање биометриски податоци, просечното време за проверка е зголемено на околу 90 секунди по патник, во споредба со претходните околу 20 секунди.
