Rockstar ја објави официјалната старосна класификација за Grand Theft Auto 6, а новите детали повторно ја отворија дебатата за содржината на долгоочекуваната игра.
Како и претходните продолженија, GTA 6 е класифицирана како игра за лица постари од 18 години. Во официјалната класификација за Австралија и Нов Зеланд, меѓу причините за ваквата одлука експлицитно се наведува и интимна содржина.
Покрај тоа, класификацијата опфаќа и употреба на дрога, експлицитно насилство, голотија и вулгарен јазик, елементи што се карактеристични за серијалот Grand Theft Auto.
GTA 6 е едно од најочекуваните изданија во гејминг-индустријата и првата голема игра од серијалот по GTA V, која беше објавена во 2013 година.
Овојпат дел од дебатата не се однесува само на насилството и криминалот, туку и на љубовната приказна меѓу ликовите.
Дебатата ја поттикна и тиктокерката Шелби Хас, позната како @diaryofasalesgirl, која пред своите следбеници изрази загриженост поради љубовните елементи во играта. Таа тврди дека играчите ќе можат да одржуваат врска со лик во играта, да разменуваат пораки и да одат на состаноци.
Нејзините ставови предизвикаа различни реакции, при што дел од корисниците ја поддржаа, додека други посочија дека планираат заедно со партнерите да ја играат играта.
Од Rockstar North објаснија дека љубовната приказна е целосно изборна и дека играчите не мора да ја истражуваат доколку не сакаат.
Роб Нелсон, еден од челните луѓе на студиото и раководител на развојот, изјави дека изборот останува кај играчите.
„Ако ви се допаѓа тој концепт, чувството е одлично. Ако не, не мора да се занимавате со тоа. Изборот е ваш“, изјави Нелсон за IGN.
Тој објасни дека приказната е поставена така што главните ликови, поради околностите, се принудени да останат заедно и да соработуваат во поголемиот дел од играта, при што низ повеќето ситуации ќе минуваат најмалку како партнери во криминалот.
