Ирската Комисија за заштита на податоците (DPC) го казни Гугл со 403 милиони евра поради прекршување на правилата на Европската Унија за заштита на личните податоци при обработката на податоците за локацијата на корисниците.
Ирскиот регулатор утврдил дека компанијата во периодот од 2018 до 2020 година ги прекршила одредбите на Општата регулатива за заштита на податоците (GDPR) преку три функции – „Активност на веб и во апликации“, „Историја на локации“ и „Точност на локацијата“.
Според DPC, поради пропустите на Гугл, корисниците можеби не биле доволно информирани дека нивните податоци за локацијата се користат, меѓу другото, за прикажување реклами и создавање заклучоци за нивните интереси.
Регулаторот дополнително оценил дека подолгото чување на податоците за локацијата од потребното ја намалило контролата на корисниците врз нивните лични информации.
На Гугл му е наложено во рок од шест месеци да ја усогласи обработката на корисничките податоци со правилата на Европската Унија.
Истрагата била започната во 2020 година по претставки од неколку европски организации за заштита на потрошувачите, меѓу кои и паневропската организација BEUC.
Од DPC соопштиле и дека водат уште три регулаторни истраги против Гугл, кои се наоѓаат во напредна фаза.
