„Алфабет“, матичната компанија на „Гугл“, планира во следните две години да инвестира најмалку 13 милијарди евра во инфраструктура за вештачка интелигенција во Финска. Од компанијата потврдија дека станува збор за нивната најголема поединечна инвестиција во Европа.
Финска во последните години се наметнува како една од најатрактивните локации за центри за податоци. Компании како „Мајкрософт“ и „БајтДенс“, сопственикот на „ТикТок“, вложуваат во земјата поради поволните енергетски услови и можноста да ги намалат трошоците, но и да ги исполнат климатските цели.
Студената клима овозможува поефикасно и поевтино ладење на компјутерските системи, додека Финска располага и со значителни количества електрична енергија со ниски емисии на јаглерод.
Инвестицијата ќе се реализира во текот на 2027 и 2028 година, а ќе опфати изградба на центри за податоци, унапредување на електроенергетската мрежа, како и проекти поврзани со чиста енергија и батериски системи.
Од „Гугл“ наведуваат дека новата инфраструктура ќе ги поддржува нивните услуги, меѓу кои се „Џемини“, „Пребарување“, „Мапи“ и „Јутјуб“.
„Новата дигитална инфраструктура ќе биде темел за дигиталната подготвеност, иновациите и развојот на вештачката интелигенција во Финска, но и во цела Европа“, соопштија од компанијата.
„Гугл“ проценува дека инвестицијата за време на изградбата ќе придонесе со околу 3,6 милијарди долари во финскиот бруто домашен производ. По ставањето на системите во функција, проектот би требало годишно да поддржува околу 7.000 работни места.
Инвестицијата е дел од пошироката стратегија на „Алфабет“ за зголемување на капацитетите потребни за развој и примена на вештачката интелигенција. Компанијата годинава ги зголеми планираните глобални капитални вложувања на меѓу 195 и 205 милијарди долари, со цел да одговори на растечката побарувачка за компјутерска моќ.
Финскиот премиер Петери Орпо оцени дека одлуката на „Гугл“ е „јасен доказ за предностите на Финска“. Според него, значењето на економијата заснована на податоци ги надминува директните инвестиции, бидејќи придонесува и за иновациите, истражувањето и развојот.
