Нова серија за Хари Потер, која ја подготвува HBO, ќе пристигне за Божиќ, а проектот веќе предизвикува поделени реакции кај обожавателите на популарната франшиза.
Станува збор за нова телевизиска адаптација на седумте романи на Џ. К. Роулинг, при што планот е секоја книга да биде претставена во една сезона. Во серијата ќе играат актери како Џон Литгоу, Ник Фрост, Антон Лесер, Кетрин Паркинсон, Папа Есиеду и Пол Вајтхаус.
Главната дилема кај дел од публиката е што приказната веќе им е добро позната на милиони обожаватели. Филмските адаптации на книгите беа објавувани од 2001 до 2011 година и за многумина станаа дел од традицијата.
По објавувањето на првиот трејлер, на социјалните мрежи се појавија реакции дека серијата тешко ќе ја задржи неизвесноста, бидејќи гледачите однапред знаат како завршува приказната. Други, пак, сметаат дека токму тоа не е целта на новата серија, туку можноста книгите да бидат пренесени на екранот многу поверно од филмовите.
Телевизискиот формат овозможува да се обработат и делови од приказната и споредни настани што не можеле да бидат вклучени во филмовите. Како пример се наведува сцената со Флафи, триглавото куче, во која во новата серија е вклучен и Невил Лонгботом, за разлика од филмската верзија.
Останува да се види дали HBO ќе успее со новата адаптација да ги освои долгогодишните обожаватели, но и да привлече нова публика.
