„Хуавеј“ се соочува со недостиг на производствени капацитети за опрема за вештачка интелигенција, поради што компанијата засега нема планови за значително проширување на продажбата на странските пазари.
Тоа го изјави еден од ротирачките претседатели на „Хуавеј“, Ерик Сју, на конференцијата „Huawei Connect“ во Шангај.
„Немаме доволно капацитети ниту да ја задоволиме побарувачката во Кина, така што засега не планираме посериозно да го прошируваме работењето на меѓународниот пазар“, рече Сју.
„Хуавеј“ сепак ја продава својата опрема за вештачка интелигенција во одредени држави каде што има голема побарувачка, но во ограничени количини.
Компанијата воедно се обидува да ѝ конкурира на „Нвидиа“ на пазарот на чипови за вештачка интелигенција. Сју изјави дека новиот чип Ascend 950DT постигнал добри резултати на тестирањата и дека „Хуавеј“ веќе разговара со кинески компании кои развиваат големи модели со вештачка интелигенција.
Тој очекува дел од овие компании во текот на следната година да почнат да ги користат системите со овој чип за обучување на своите модели.
„Хуавеј“ претходно најави дека Ascend 950DT треба да биде достапен во последното тримесечје од годинава. Компанијата паралелно развива и нови чипови, како и големи компјутерски системи што поврзуваат илјадници процесори.
Сју смета дека семејството чипови Ascend веќе зазема поголем дел од кинескиот пазар на чипови за вештачка интелигенција од „Нвидиа“, но компанијата не објавила податоци со кои би го поткрепила тоа тврдење.
„Нвидиа“ и натаму има значајна предност во софтверот благодарение на платформата CUDA, која со години се користи за развој и обучување на модели со вештачка интелигенција. Поради тоа, „Хуавеј“ работи на сопствен екосистем на хардвер и софтвер како кинеска алтернатива.
Развојот на сопствени технологии дополнително е забрзан по американските ограничувања за пристапот на кинеските компании до најнапредните чипови на „Нвидиа“, како и до дел од технологијата и опремата потребни за производство на напредни полупроводници.
„Хуавеј“ е под американски трговски ограничувања од 2019 година. Компанијата смета дека Кина мора да развие сопствен технолошки синџир и да ја намали зависноста од странски напредни чипови.
