Мексиканската инфлуенсерка и креаторка на дигитални содржини Паола Маркес е пронајдена мртва во својот стан во градот Сан Луис Потоси, а веста за нејзината смрт предизвика шок кај милионите нејзини следбеници.
Триесетгодишната Маркес била пронајдена без знаци на живот во саботата, по што на местото пристигнале итните служби. Медицинските екипи можеле само да ја констатираат смртта.
Надлежните институции ја истражуваат трагедијата и засега случајот го третираат како можно самоубиство, иако официјалната причина за смртта сè уште не е соопштена.
Тажната вест ја потврди нејзиниот татко, Херкулес Маркес Балдерас, кој преку социјалните мрежи се прости од својата ќерка.
„Почивај во мир, принцезо моја“, напиша тој во емотивната порака.
Паола Маркес беше една од попознатите инфлуенсерки во Мексико, со повеќе од два милиони следбеници на платформите ТикТок, Инстаграм и Фејсбук. Популарноста ја стекна преку содржини поврзани со нејзиниот животен стил, патувања и секојдневни активности.
По објавувањето на веста за нејзината смрт, нејзините профили на социјалните мрежи беа преплавени со пораки на сочувство од обожаватели и пријатели, кои се потсетуваат на позитивното влијание што го имала врз нивните животи.
Доколку вие или некој што го познавате се соочува со мисли за самоповредување или самоубиство, побарајте помош од блиски лица или од стручни служби за психолошка поддршка.
