Гледачите кои ги следат Олимписките игри 2024 година во Париз може да забележат необична виолетова патека на стадионот „Франција“.
Оваа патека, која ќе биде во употреба од 26 јули до 11 август, ја изработи италијанската компанија Mondo и користи иновативни материјали за подобрување на перформансите на тркачите.
Патеката е единствена не само по боја, туку и по материјалот од кој е направена. Се користи прашок од мелени школки, кои се богати со калциум карбонат. Овој материјал е познат по својата издржливост и отпорност, а неговата употреба ја намалува количината на отпад и емисиите на CO2, а со тоа придонесува за зачувување на животната средина.
Покрај еколошките придобивки, патеката е дизајнирана да ги подобри перформансите на тркачите. Истражувањата покажаа дека патеката има одличен контакт со чевлите, што придонесува за помала загуба на енергија и подобра брзина. Овој тип на подлога за прв пат беше искористен на Светското првенство во атлетика во 2023 година во Будимпешта, каде што тркачите дадоа позитивни коментари.
- Луѓето веќе забележаа дека патеката има посебно чувство и квалитет - изјави Алесандро Пичели од Мондо.
Додека многу рекорди беа срушени во Токио 2020 година благодарение на напредокот во обувките и патеките, виолетовата патека во Париз се очекува да донесе уште поголеми резултати. Со модерни материјали и дизајн, оваа патека би можела да биде клучот за соборување на нови светски рекорди.
