Компанијата Мета ја проширува употребата на вештачката интелигенција за утврдување на возраста на корисниците на Инстаграм, со цел повеќе тинејџери автоматски да бидат префрлени на посебни сметки со дополнителни заштитни поставки.
Технологијата ќе овозможи препознавање на малолетни корисници врз основа на информациите и содржината на нивните профили, дури и кога датумот на раѓање е внесен така што покажува дека се полнолетни. По процената, тие ќе бидат префрлени на таканаречените „Тинејџерски сметки“, со ограничувања за тоа кој може да ги контактира, какви содржини можат да гледаат и колку време да поминуваат на платформата.
Мета соопшти дека родителите во САД во текот на овој месец ќе почнат да добиваат известувања со објаснувања за начинот на кој се утврдува возраста на младите корисници и како можат да помогнат податоците да бидат точни.
Компанијата вовела и дополнителен систем за проверка во Австралија, каде што користи податоци од „Епл“ за возрасните категории на корисниците на уредите. Технологијата постепено се воведува и на Фејсбук, додека сличен систем за платформата Тредс се очекува подоцна годинава.
Проширувањето на системот доаѓа во време кога Мета се соочува со повеќе тужби во кои се тврди дека нејзините социјални мрежи им нанесуваат штета на младите. Во август компанијата постигнала спогодби вредни до 18 милијарди долари, односно околу 15,5 милијарди евра, со речиси сите американски сојузни држави и територии.
Минатиот месец Мета постигнала спогодба и со млада тужителка во судски процес во Лос Анџелес, во кој се разгледувало дали Инстаграм и Фејсбук се осмислени така што предизвикуваат зависност и придонесуваат за нарушувања на менталното здравје и исхраната кај младите.
Како дел од договорот со американските држави, компанијата се обврзала да го подобри препознавањето на малолетните корисници, вклучително и децата помлади од 13 години, на кои не им е дозволено да ги користат нејзините платформи.
