Apple денеска, 14 септември, треба да го пушти iOS 27 за корисниците на поддржаните модели на iPhone, а најголемата новина е целосно преработената Siri, која со вештачка интелигенција треба да може да одговара и на многу посложени барања.
Според најавата, ажурирањето се очекува околу 19 часот по македонско време и ќе може да се преземе преку Settings → General → Software Update.
iOS 27 ќе биде достапен за iPhone 11 и поновите генерации, како и за iPhone SE од втората генерација и поновите модели. Сепак, не сите нови функции ќе работат на сите поддржани телефони.
Главната новина е Siri AI. Наместо досегашниот асистент, кој главно се користеше за поедноставни команди, Apple воведува значително помоќна верзија што по концептот се приближува до современите асистенти како ChatGPT.
Siri AI ќе може да користи лични информации зачувани на iPhone за да даде поконкретни одговори, ќе има увид во содржината прикажана на екранот и ќе може да извршува задачи во апликациите што ја поддржуваат оваа функционалност.
Новата Siri добива и посебна апликација, а и понатаму ќе може да се активира со задржување на страничното копче на iPhone.
Тука, сепак, има важно ограничување – Siri AI и дел од останатите функции на Apple Intelligence бараат iPhone 15 Pro или понов модел. На почетокот Siri AI ќе биде достапна само на англиски јазик, а ќе има и дневни ограничувања за користење. Според најавите на Apple, проширен пристап во иднина ќе се нуди и со плаќање.
Siri AI првично нема да биде достапна во Европската Унија поради регулаторните несогласувања меѓу Apple и Европската комисија.
Со iOS 27 пристигнуваат и дополнителни алатки базирани на Apple Intelligence. Во Photos се додаваат опциите „Extend“ и „Reframe“, Image Playground ќе може да создава пореалистични фотографии, а во Shortcuts ќе биде можно корисникот едноставно да опише што сака да направи и системот да ја креира потребната автоматизација.
Промени има и во изгледот. Дизајнот Liquid Glass, претставен со iOS 26, дополнително е доработен. Apple најавува подобар контраст, поизострени и подетални икони, како и можност корисникот сам да ја приспособува проѕирноста на интерфејсот.
Еден од најпрактичните делови на надградбата треба да биде подобрувањето на перформансите. Според Apple, апликациите може да се отвораат до 30 проценти побрзо, новите фотографии во Photos да се вчитуваат до 70 проценти побрзо, а трансферите преку AirDrop да бидат до 80 проценти побрзи.
Нова е и функцијата iPhone Handoff, која овозможува префрлање меѓу два iPhone уреди што користат ист телефонски број. Функцијата зависи од поддршката на мобилните оператори и може дополнително да се наплаќа.
Find My, пак, добива поголема контрола врз споделувањето на локацијата. Корисникот ќе може прецизно да одреди колку долго некој ќе ја гледа неговата локација, но и привремено да го паузира споделувањето со одредено лице до крајот на денот.
Новини има и за CarPlay. Кај компатибилните автомобили ќе биде овозможено гледање видеосодржини на екранот во возилото, но исклучиво додека автомобилот е паркиран. Apple им овозможува и на програмерите да создаваат CarPlay апликации преку кои видеата ќе може директно да се пребаруваат.
Во САД се воведува и функција за поделба на сметка преку Apple Cash. Со помош на Apple Intelligence, iPhone ќе може да препознае сметка, да ги распореди ставките меѓу повеќе лица и да го пресмета износот што секој треба да го плати, вклучително данок и бакшиш.
iOS 27 ќе може да се инсталира на сериите iPhone 11, 12, 13, 14, 15, 16, 17 и новата генерација iPhone 18, како и на поддржаните модели iPhone SE, iPhone Air и iPhone Duo.
