Ирска нема да учествува на Евровизија во 2027 година, ниту ќе го емитува натпреварот, со што вторпат по ред го бојкотира музичкиот настан поради учеството на Израел. Ирскиот јавен сервис РТЕ соопшти дека одлуката е поврзана со, како што наведува, загубата на животи и хуманитарната криза во Газа.
Ирска беше меѓу петте земји, заедно со Холандија, Исланд, Словенија и Шпанија, кои не учествуваа на овогодишниот натпревар во знак на протест поради учеството на Израел.
Директорот на Евровизија, Мартин Грин, изјави дека организаторите жалат поради одлуката на РТЕ, но целосно ја почитуваат.
„Сите радиодифузери одлучуваат на годишна основа дали ќе учествуваат на натпреварот следната година. Ќе останеме во дијалог со РТЕ и се надеваме дека ќе ги пречекаме повторно на натпреварот во иднина“, изјави Грин.
И холандскиот јавен радиодифузер АВРОТРОС минатиот месец најави дека нема да учествува на Евровизија во 2027 година, оценувајќи дека натпреварот повеќе не може да се смета за неутрален поради учеството на земја која, како што наведоа, е вклучена во голем воен конфликт.
Следната Евровизија треба да се одржи во мај во бугарското црноморско одморалиште Бургас, откако бугарската пејачка Дара победи на натпреварот во 2026 година со песната „Бангаранга“.
Евровизискиот натпревар започна во 1956 година, меѓу другото со идеја преку музиката да придонесе за обединување на Европа по Втората светска војна. Израел учествува на натпреварот од 1973 година.
Повиците за исклучување на Израел се засилија поради постапувањето на Владата на премиерот Бенјамин Нетанјаху во текот на војната во Газа. На Евровизија во Малме во 2024 година, Базел во 2025 година и Виена во 2026 година беа забележани пропалестински протести, поради што беа преземени и дополнителни безбедносни мерки.
