Ново истражување објавено од Американското здружение за срце укажува на поврзаност меѓу енергетските пијалаци и додатоците во исхраната со стимулативни состојки и сериозни срцеви проблеми, вклучително и срцев удар, нарушувања на срцевиот ритам и ненадеен срцев застој.
Истражувањето се заснова на анализа на повеќе од 28.000 пријави доставени до Американската агенција за храна и лекови во периодот од 2017 до 2025 година. Научниците утврдиле дека кај возрасните на возраст од 18 до 34 години кои имале срцеви проблеми почесто била забележана употреба на енергетски пијалаци со кофеин и додатоци со стимуланси, како прашоци за пред тренинг.
Според наодите, срцевите удари биле околу 4,5 пати почесто поврзани со овие производи. Нарушувањата на срцевиот ритам, особено вентрикуларните аритмии, и срцевите палпитации биле околу четири пати почесто поврзани со високиот внес на кофеин.
Истражувачите утврдиле и поврзаност со други здравствени проблеми: забрзана работа на срцето била речиси трипати почеста, болките во градите 2,71 пати, а несвестицата речиси двојно почеста.
Авторот на истражувањето, Сај Самјамантула од Медицинскиот факултет при Универзитетот во Вирџинија, смета дека наодите укажуваат на потребата од посистематско следење на безбедноста на производите што содржат кофеин и стимулативни состојки.
Тој посочува дека здравствените работници треба да ги прашуваат помладите пациенти кои пријавуваат забрзано чукање на срцето, болки во градите или несвестица дали неодамна или редовно консумирале вакви производи.
