Италијанската влада покрена иницијатива за промена на меѓународниот назив на мерната единица за електричен напон „волт“ во „волта“, со цел да му оддаде почит на италијанскиот научник Алесандро Волта, два века по неговата смрт.
Волта, кој се смета за пронаоѓач на електричната батерија и откривач на метанот, го дал името на единицата, но во англизирана форма. Владата на премиерката Џорџа Мелони сега сака да го „врати“ оригиналниот италијански облик со додавање на буквата „а“ на крајот.
Според италијанските власти, иницијативата е дел од поширок напор за промоција на научното наследство на Италија и нејзината улога во светските технолошки иновации.
Заменик-министерот за дигитализација Алесио Бути вчера во Париз разговарал со Анет Ку, директорка на Меѓународното биро за тегови и мерки, организацијата задолжена за меѓународните стандарди за мерење.
Бути изјавил дека предлогот не е само јазично прашање, туку и обид за историско признание на еден од „татковците на модерната наука“, чии откритија го промениле односот на човештвото кон електричната енергија и технолошкиот развој.
Тој посочил дека повеќеИто мерни единици именувани по научници го задржуваат целосното презиме, како што се „херц“, „њутн“ и „ват“.
Промената најпрво би требало да биде воведена на национално ниво, а потоа Италија ќе се обиде да обезбеди меѓународна поддршка за официјално усвојување на предлогот на Генералната конференција на Меѓународното биро за тегови и мерки, која треба да се одржи во октомври годинава.
