Јелена Карлеуша, која досега јавно се изјаснувала како атеистка, откри дека во тежок период од животот разговарала со владика и токму тој разговор ѝ помогнал да најде мир и полесно да го надмине тешкиот период.
Во гостувањето во емисијата „150 минути“ на ТВ Прва, Карлеуша рече дека и понатаму се смета за атеистка, но раскажа дека на „еден Божји човек“ му ја признала својата ориентација, по што тој ѝ одговорил дека токму таквите луѓе најмногу ги сака.
„Беше многу смирен и избра многу убав начин на комуникација со мене и ми помогна да пребродам еден многу тежок период“, раскажа пејачката.
Таа откри дека во периодот кога требало да објави нови песни, решила целосно да го промени тимот со кој работи. Иако, како што вели, многумина ѝ свртеле грб, а во некои луѓе се разочарала, вистинските пријатели останале покрај неа. Според Карлеуша, промената се покажала како успешна, бидејќи нејзините песни веќе еден месец се присутни во трендинг-листите.
Зборувајќи за периодот низ кој поминала, таа истакна дека избрала да простува, да разбира и во луѓето да ја бара позитивната страна.
„Ако гледам омраза и негативност, избирам да не бидам дел од тоа. Со позитивна енергија тргнав со новите песни. Сè што можеше да ме скрши, ме скрши“, рече Карлеуша, додавајќи дека на жените им порачува да ја препознаат сопствената сила и достоинствено да ги надминат тешките моменти.
„По долго време излегов од темнината. Сега сè е во ред“, порача таа.
Во екранизацијата на истоимената песна учествуваат и нејзините ќерки, за кои Карлеуша вели дека се нејзината најголема среќа во животот.
