„Јутјуб“ започна со воведување големи промени во изгледот на својата мобилна апликација, но новиот дизајн наиде на незадоволство кај голем број корисници. Најмногу реакции предизвика отстранувањето на посебното јазиче „Subscriptions“, преку кое корисниците досега лесно пристапуваа до каналите што ги следат.
Новата навигација претставува една од најголемите промени на изгледот на апликацијата во последната деценија. Досегашниот распоред со пет главни копчиња е заменет со нов, кој поголем простор им отстапува на кратките видеосодржини Shorts и на можностите за создавање видеа.
Содржините од каналите на кои корисниците се претплатени сега ќе бидат достапни со повлекување на прстот на почетната страница, наместо преку посебно јазиче.
Промената постепено се воведува на уредите со Android и iOS, без потреба од посебно ажурирање на апликацијата.
Корисниците сметаат дека со новиот распоред „Јутјуб“ им дава предност на содржините што ги избира алгоритмот, наместо на каналите што самите сакаат да ги следат. Новата почетна страница сепак овозможува создавање приспособени листи со содржини, со кои корисниците можат да го организираат видеоматеријалот што го гледаат.
Останува да се види дали оваа можност ќе го намали незадоволството од редизајнот.
