Јужнокорејските власти ги казнија американските технолошки компании Google и Apple со вкупно 47,6 милиони долари поради злоупотреба на нивната положба на пазарот за апликации. Регулаторот утврдил дека компаниите ги насочувале домашните програмери кон сопствените системи за плаќање и неоправдано ги одложувале проверките на апликациите.
Google е казнет со 42,9 милијарди вони, односно околу 32 милиони долари, додека Apple треба да плати 20,8 милијарди вони, или приближно 15,5 милиони долари.
На двете компании им е наложено да им овозможат на јужнокорејските програмери да користат врски за надворешно плаќање во апликациите и да ги подобрат постапките за нивна проверка.
Според наодите на регулаторот, иако Google и Apple формално дозволувале користење други системи за плаќање, за тоа наплаќале провизија од 26 отсто. Истовремено, програмерите немале пристап до сите функции што ги нуделе сопствените системи на компаниите.
Истрагата покажала и дека во одредени случаи проверките на апликациите биле одложувани без јасно објаснување за причините и времетраењето на застојот.
Apple дополнително е обвинет дека од 2015 година до јануари 2023 година им наплаќал повисоки провизии на програмерите во Јужна Кореја отколку на оние во други земји.
Јужна Кореја во 2021 година стана првата држава во светот што донесе закон со кој на сопствениците на продавници за апликации им се забранува да им наметнуваат сопствени системи за плаќање на програмерите.
