Германските домаќинства плаќале највисока цена за електрична енергија во Европската Унија во првата половина од 2025 година, додека природниот гас бил најскап во Шведска, покажуваат најновите податоци на Евростат.
Просечната цена на електричната енергија за домаќинствата, со вклучени даноци и давачки, изнесувала 38 евра за 100 киловат-часови во Германија. Следуваат Белгија со 36 евра и Данска со 35 евра.
Од друга страна, најниските цени на струјата се регистрирани во Унгарија, каде што домаќинствата плаќале 10 евра за 100 киловат-часови, потоа во Малта со 12 евра и Бугарија со 13 евра.
Кај деловните потрошувачи, највисоката цена на електричната енергија е забележана во Ирска, а најниската во Финска.
Кога станува збор за природниот гас, Шведска е земјата со највисока цена за домаќинствата – 21 евро за 100 киловат-часови. По неа следуваат Холандија со 16 евра и Данска со 13 евра.
Најевтин природен гас плаќале домаќинствата во Унгарија, каде што цената изнесувала три евра за 100 киловат-часови, пред Хрватска со пет евра и Романија со шест евра.
Евростат посочува дека во Данска речиси половина од крајната цена на електричната енергија отпаѓа на даноци и давачки, додека во Холандија, Ирска и Луксембург државните субвенции значително ја намалиле цената што ја плаќаат домаќинствата.
