Калиопи во ново интервју отворено зборуваше за својот син Пако, кој живее во Швајцарија, но и за жртвите што ги носела нејзината долгогодишна музичка кариера.
Пејачката призна дека музиката отсекогаш била нејзината најголема љубов и дека поради професионалните обврски имало периоди во кои не можела да му посвети доволно време на својот син.
„Музиката е мојата најголема љубов, ја ставив пред многу битни нешта во мојот живот. Па дури, нема да кажам пред своето дете, затоа што моето дете е на прво место, но имаше моменти кога во име на тоа и тој оскудуваше од моето присуство во неговиот живот“, рече Калиопи во интервју за „Хајп“.
Таа истакна дека денес е особено благодарна за љубовта, поддршката и разбирањето што ги добива од Пако.
„Убаво е да се види кога син ти е горд на тебе и на тоа што го работиш“, додаде пејачката.
Пако е единствениот син на Калиопи и композиторот Ромео Грил. Тие своевремено беа во брак, а во периодот на најголемата популарност на групата „Калиопи“ живееја во Швајцарија. По разводот во 1996 година, Ромео и Пако останале да живеат таму, додека Калиопи се вратила во Македонија и продолжила со својата музичка кариера.
И покрај разводот, Калиопи и Грил го зачувале блискиот однос и продолжиле да соработуваат професионално. Тој е автор на бројни песни од нејзиниот репертоар, меѓу кои „Роѓени (Бато)“ и „Црно и бело“, со која Калиопи ја претставуваше Македонија на Евровизија во 2012 година.
Калиопи и претходно со гордост зборувала за својот син и за разбирањето и поддршката што ги има од него.
