Се крена вистинска драма околу најавените концерти на Канје Вест во Русија. Додека управата на стадионот тврди дека настапите нема да се одржат бидејќи не постои договор за закуп на просторот, организаторите велат дека концертите сепак не се откажани.
Управата на стадионот „Газпром Арена“ во Санкт Петербург соопшти дека двата најавени концерти на Канје Вест нема да се одржат во нивниот простор. Организаторите од агенцијата „Say Agency“, пак, тврдат дека настапите сè уште не се откажани и дека веќе добиле авансна уплата за концертите.
Концертите требаше да бидат првиот настап на голема западна ѕвезда во Русија од почетокот на Специјалната воена операција во Украина, пишува „Гардијан“.
„Газпром Арена“ претходно на социјалните мрежи најави дека „највлијателниот музичар на нашето време“ ќе настапи на 10 и 11 октомври, со порака: „Ова не е шега!“
Билетите брзо биле распродадени, а нивната цена достигнувала дури 1.390 фунти, односно околу 1.600 евра.
Сега управата на стадионот официјално демантира дека бил постигнат договор.
„Газпром Арена“ ниту била ниту е организатор на овој настан. Таа улога ја има московската агенција „Say Agency“. Немаме потпишано никаков договор за закуп на стадионот за овој концерт. Таков договор не постои и затоа концертот не може да се одржи во нашиот простор“, соопштија од Арената.
Од агенцијата „Say Agency“ преку Телеграм одговориле дека објавата ги изненадила, но дека „концертот засега не е откажан“.
Тие објасниле дека настапите биле најавени откако „Газпром Арена“ одобрила „официјално писмо“, но признале дека конечниот договор за закуп сè уште не е потпишан. Рокот за негово потпишување истекува на крајот од оваа недела.
Проблемите со организацијата на концертите во Русија следуваат откако Велика Британија, Италија, Полска, Швајцарија и Франција претходно ги блокираа настапите на Вест.
Како причина биле наведени безбедносните ризици поврзани со неговите антисемитски изјави и искажувањето симпатии кон нацизмот.
Раперот во јануари се извини за своето однесување и јавно зборуваше за проблемите со менталното здравје.
„Не сум нацист ниту антисемит. Ги сакам Евреите“, напиша тогаш.
Портпаролката на руското Министерство за надворешни работи, Марија Захарова, изјави дека Русија е отворена за настапи на странски уметници, но дека коментарите на американскиот рапер Канје Вест за германскиот лидер Адолф Хитлер, кој ја започна Втората светска војна, отвораат сериозни прашања.
„Не сме затвориле врата за ниту еден уметник, не ги затвораме и нема да ги затвориме. Веројатно нашите врати се затворени само за оние кои проповедаат нацистичка или неонацистичка националистичка идеологија“, рече Захарова пред новинарите на маргините на Фестивалот на нови медиуми во Солнечногорск, во Московската област, пренесува РИА Новости.
Захарова нагласи дека Русија организира бројни фестивали и меѓународни натпревари на кои учествуваат странски изведувачи, но дека постапките на Канје Вест „отвораат големи прашања“.
„Не знам како да се изразам, зборот ‘постапки’ е тешко соодветен – постапки, перформанси или, како што самиот ги нарече, болни манифестации, поврзани со величење на Хитлер, ширење на свастиката и наведување во песните на соодветни идеологии“, рече Захарова.
Таа оцени дека таквите постапки се шокантни, бидејќи во 21 век можат да се очекуваат само од ментално болни луѓе.
Пратеникот Виталиј Милонов изјави дека Вест на концертите треба да пее традиционални руски песни.
„Можеби потоа ќе престане со одвратните испади и ќе стане нормална личност“, додаде Милонов.
Организаторите од агенцијата „Say Agency“ претходно признаа дека се свесни за контроверзиите што го следат музичарот.
„Не треба да се заборави сè што кажал Канје Вест. Лесно е да се суди врз основа на една изјава. Потешко е да се сослуша човек кој со децении ја менува индустријата. Ние го сослушавме“, порачаа во една од претходните објави.
И покрај сè, Вест продолжува со настапите таму каде што му се дозволени.
Неодамна одржа концерти во САД, Турција, Холандија, Грузија, Албанија, Португалија и Казахстан, а во план се и настапи во Индонезија.
Со актуелната турнеја го промовира својот 12-ти самостоен албум „Bully“, објавен во март.
