Во време кога вештачката интелигенција сè повеќе навлегува во секојдневието и ги замаглува границите меѓу луѓето и машините, речникот на Кембриџ го прогласи зборот „човечки“ (human) за збор на годината за 2026 година.
Во образложението на изборот, од речникот наведуваат дека годината ја одбележале глобалните дебати за значењето на човечноста во време на забрзан развој на вештачката интелигенција. Придавката „човечки“ се дефинира како поседување особини, недостатоци и чувства карактеристични за луѓето, за разлика од боговите, животните или машините, пренесува Си-ен-ен.
Како пример за оваа дебата се посочуваат изјавите на познати интелектуалци, меѓу кои и пионерот во областа на вештачката интелигенција и добитник на Нобеловата награда, Џефри Хинтон, кој изјавил: „Создаваме вонземни суштества. Подготвен сум да бидам себичен и да ги изберам луѓето“.
Од Кембриџ го издвојуваат и напредокот на технологијата за создавање дипфејк-содржини, со која може да се имитираат луѓе, како и реакциите на познатите личности. Меѓу нив се Метју Меконахи и Тејлор Свифт, кои ги заштитиле својот лик и гласовните снимки како трговски марки.
Лексикографот Колин Мекинтош оценува дека вештачката интелигенција го менува начинот на кој зборуваме за човечноста. Тој посочува дека дефиницијата на зборот традиционално ги разликувала луѓето од боговите и животните, а во поново време и од машините.
Како показател за оваа промена се наведува и зголемената употреба на изрази како „human-made“, односно „направено од човечка рака“, со кои се разликуваат човечките дела од оние создадени со помош на вештачка интелигенција. Според Мекинтош, обновениот интерес за значењето на човечноста го одразува духот на времето.
Покрај зборот на годината, речникот на Кембриџ објави и неколку нови зборови и изрази што ги вклучил во своето издание.
Меѓу нив е „ер џејл“ (air jail), метод на обид за дресирање животно, особено куче, со негово држење подигнато од земјата одредено време кога покажува агресивно или друго непожелно однесување.
Во речникот е вклучен и изразот „аура фарминг“ (aura farming), кој се однесува на преземање постапки со цел некој да се претстави како личност на која другите ѝ се восхитуваат и ја сметаат за привлечна и интересна.
Третиот нов израз е „луксмаксинг“ (looksmaxxing), што означува настојување физичкиот изглед да се направи што е можно попривлечен. Овој тренд на социјалните мрежи го поттикнуваат одредени корисници, главно млади мажи.