Кијану Ривс повторно ќе го позајми гласот на Џон Вик во нов анимиран филм посветен на настаните што му претходат на првиот филм од познатиот серијал, објавен во 2014 година.
Студиото „Лајонсгејт“ го потврди враќањето на актерот во проектот, чија приказна ќе ја прикаже легендарната „невозможна задача“ на Џон Вик – во текот на една ноќ да ги елиминира сите свои ривали. Со нејзиното исполнување, тој се ослободил од обврските кон „Високата маса“ и добил можност да започне мирен живот со сопругата Хелен.
Режисер на филмот е Шенон Тиндл, додека продуцент е Чад Стахелски, кој ги режираше сите четири главни филмови од серијалот. Тој истакна дека јапонската анимација имала големо влијание врз неговата работа и врз создавањето на светот на Џон Вик.
Датумот на премиерата сè уште не е објавен. Ривс првпат се појави во улогата на Џон Вик во 2014 година, а последен пат го толкуваше ликот во филмот „Од светот на Џон Вик: Балерина“ од 2025 година.
