Календарот со 12 изненадувања на брендот SKIMS на Ким Кардашијан, кој чини 148 долари, предизвика бројни негативни реакции на социјалните мрежи. Наместо луксузни подароци, купувачите во него пронашле секојдневни додатоци како ластичиња, шноли, приврзоци, чешел и прерамки за градник.
Реакциите се засилија откако корисничка на ТикТок објави видео во кое ги отвора сите 12 прегради. Снимката надмина 34 милиони прегледи, а корисниците се потсмеваа на содржината, оценувајќи дека производите не вредат ни приближно колку што чинат.
Дел од коментарите го споредија календарот со предмети што луѓето ги чуваат заборавени во автомобилот или во ноќното шкафче. Други ѝ се заблагодарија на корисничката што им заштедила пари со тоа што ја открила содржината пред да го купат производот.
Сепак, на официјалната страница на SKIMS календарот бил претставен како пакет со модни додатоци, а не како колекција облека или скапоцени подароци. Критиките главно се однесуваат на високата цена и очекувањата што ги создава луксузното пакување.
Случајот повторно го отвори прашањето колку купувачите плаќаат за самиот производ, а колку за познатото име на брендот.
