По 13 години чекање, „ГТА 6“ излегува утре, а дел од обожавателите веќе испланирале како ќе го поминат работниот четврток. Во анкета на „БамбуХР“ меѓу повеќе од 1.500 вработени во САД, 18 отсто рекле дека планираат да земат слободен ден за премиерата. „Рокстар гејмс“ потврди дека играта излегува на 19 ноември за PlayStation 5 и Xbox Series X|S.
Покрај анкетата, „БамбуХР“ ги анализирала и барањата за платен одмор во својата платформа, која опфаќа повеќе од 3,4 милиони вработени во САД. За 19 ноември, стапката на барања била речиси 13 отсто повисока отколку за споредливите денови во 2024 и 2025 година. Благ пораст имало и за петокот по премиерата. Од евиденцијата, сепак, не може да се утврди колкумина побарале одмор токму поради играта.
Дека дел од вработените намерно го приспособуваат распоредот за „ГТА 6“ покажува и анкета на „Зети“ меѓу 1.040 вработени во САД. Од нив, 11 отсто рекле дека поради играта планираат да земат одмор или да го сменат работното време. Некои обожаватели на социјалните мрежи пишуваат дека за играта одвоиле и по неколку дена, објави „Гардијан“.
Тврдењето дека „ГТА 6“ ќе ги испразни работните места низ светот оди подалеку од достапните податоци. Анкетите покажуваат колкумина планираат да играат уште првиот ден. Колкумина навистина ќе отсуствуваат од работа поради играта, ќе се знае дури по премиерата, ако работодавците воопшто ја евидентираат причината.