Кристијано Роналдо, Лионел Меси и музичарот Бед Бани се на врвот на листата на познати личности чии спонзорирани објави на Инстаграм имаат најголема проценета вредност. Според истражувањето на платформата PlayersTime, една објава на Роналдо би можела да вреди дури 10,39 милиони евра.
Меси е на второто место со проценети 9,31 милиони евра, додека Бед Бани е трет со 9,13 милиони евра. На листата следуваат индискиот играч на крикет МС Дони со 8,43 милиони евра и В од јужнокорејската група БТС со 7,22 милиони евра.
Истражувањето покажува дека бројот на следбеници не е единствениот фактор што ја одредува вредноста на објавите. Бед Бани и Дони имаат околу 50 милиони следбеници, но нивните објави бележат значително поголем број реакции. Роналдо, кој има повеќе од 679 милиони следбеници, во просек добива околу 11 милиони допаѓања на објава.
Зендаја се наоѓа на осмото место со проценета вредност од 4,72 милиони евра по објава, додека Тејлор Свифт е на 12. место со околу 4,03 милиони евра, иако има повеќе следбеници.
Меѓу првите десет се и уште двајца членови на БТС – Суга на седмото и Џин на десеттото место. Георгина Родригез, партнерката на Роналдо, е деветта со проценети 4,48 милиони евра.
Истражувањето опфатило по 20 најследени профили на Инстаграм во 40 земји. Од првите 20 профили со најголема проценета вредност, само пет им припаѓаат на жени.
Станува збор за проценки на потенцијалната вредност на спонзорираните објави, а не за потврдени суми што познатите личности навистина ги наплатуваат.
