Атина Тошиќ, ќерката на Јелена Карлеуша и Душко Тошиќ, започнува ново поглавје од својот живот во Италија, каде што ќе студира моден менаџмент. Таа се запишала на престижни студии во Милано, а за време на образованието ќе живее во стан во еден од најбараните делови на градот.
Според извор за „Информер“, месечната кирија за станот изнесува околу 5.000 евра. Локацијата, безбедноста и близината до факултетот биле меѓу главните фактори при изборот на домот.
„Станот се наоѓа во една од најбараните зони во Милано. Безбедноста, близината до факултетот и целокупната инфраструктура беа клучни. Јелена сакаше Атина да ги има најдобрите можни услови“, наведува изворот.
Атина претходно посетувала меѓународно училиште, каде што го усовршила англискиот јазик. Според изворот, тоа ѝ помогнало при запишувањето на студии во странство.
Тригодишните студии на универзитетот што го избрала, според објавените информации, чинат околу 90.000 евра.
„Тоа е сериозна инвестиција, но семејството на тоа гледа како на вложување во иднината на Атина. Таа веќе покажа интерес за модата и дизајнот и сите веруваат дека Милано е идеално место за да го развие својот потенцијал“, вели изворот.
Јелена Карлеуша неодамна откри дека семејството веќе барало стан во Милано и дека таа и нејзиниот поранешен сопруг Душко Тошиќ се договориле еден од нив постојано да биде со Атина.
Карлеуша објаснила дека одлуката за продолжување на образованието била внимателно планирана, при што на семејството му било особено важно Атина да има безбедност и поддршка во текот на студиите.
„Оди во Милано, јас ќе одам со неа, бараме стан. Ќе студира моден менаџмент на еден престижен универзитет. Таму имам многу пријатели, ќе имаме убав стан. Ќе организираме сè така што Атина да биде апсолутно безбедна. Или Душко или јас постојано ќе бидеме со неа. Така се договоривме“, рекла Карлеуша за „Курир“.
Милано, како еден од најпознатите светски центри на модата, за семејството се наметнал како соодветно место за Атина да го продолжи образованието и да го развива интересот за модата и дизајнот.
