Американската технолошка компанија „Антропик“, позната по системот за вештачка интелигенција Клод, започна постапка за излез на берзата Насдак. Компанијата, која е еден од главните конкуренти на „ОпенАИ“, би можела да оствари рекордна продажба на акции.
Според медиумските извештаи, „Антропик“ би можела да собере до 100 милијарди долари, а нејзината вкупна вредност да достигне меѓу 1.500 и 2.000 милијарди долари. Овие износи засега се процени, а датумот за почеток на тргувањето и цената на акциите сè уште не се утврдени.
Компанијата ја основал Дарио Амодеи во 2021 година, заедно со група истражувачи кои претходно работеле во „ОпенАИ“. Нејзин најпознат производ е Клод, систем за вештачка интелигенција што може да пишува текстови, да анализира документи и да помага во програмирањето. Особено внимание привлекол и алатот Клод код, наменет за пишување и проверка на компјутерски код.
Во првата половина од 2026 година, „Антропик“ остварила приходи од 16,3 милијарди долари, наспроти околу 1,2 милијарди долари во истиот период минатата година. Во истиот извештаен период компанијата пријавила нето-загуба од 80,7 милијарди долари, од кои 72,4 милијарди се поврзани со сметководствени промени во вредноста на претходни финансиски договори.
Планираниот излез на берзата доаѓа во време на растечка загриженост околу огромните вложувања во вештачката интелигенција, вклучително и во центрите за податоци и компјутерската инфраструктура. Инвеститорите сè почесто се прашуваат дали приходите од овие технологии ќе бидат доволни за да ги оправдаат високите трошоци.
