Користењето вештачка интелигенција за управување со личните финансии станува сè почесто, но стручњаците предупредуваат дека постојат податоци што никогаш не треба да се споделуваат со чет-ботови како ChatGPT, Gemini, Claude и Grok, бидејќи нивното откривање може да доведе до злоупотреби, финансиски измами и кражба на идентитет.
Од планирање на домашниот буџет и анализа на трошоците до совети за штедење и отплата на долгови, вештачката интелигенција може да биде корисна алатка. Сепак, експертите советуваат корисниците да не внесуваат информации што можат да го откријат нивниот идентитет или да овозможат пристап до банкарските сметки.
Меѓу податоците што не треба да се споделуваат се броевите на банкарските сметки, кредитните и дебитните картички, лозинките и ПИН-кодовите, матичните броеви и броевите за социјално осигурување, како и целосните банкарски изводи, даночните пријави и документите за кредити.
Овие документи често содржат повеќе чувствителни информации на едно место, како име и презиме, адреса, податоци за работодавачот и банкарската сметка, со што се зголемува ризикот од злоупотреба доколку дојдат до погрешни раце.
Нава Кнафо, раководителка за управување со ризици во „National Bank Financial“, за „HuffPost“ предупредува дека корисниците не треба да споделуваат ништо што може да ги идентификува или да овозможи пристап до нивните сметки. Таа посочува дека, во зависност од поставките на платформата, разговорите со вештачката интелигенција може да се чуваат, прегледуваат или користат за подобрување на моделите.
Дополнително, чет-ботовите не подлежат на истите обврски за доверливост и заштита на податоците како банките и лиценцираните финансиски советници, предупредува Кнафо.
На сличен ризик укажува и Гуру Сахајпал, раководител на секторот за финансиски услуги и финансиска технологија во компанијата „Cognizant“. Според него, на алатките за вештачка интелигенција вообичаено не им се потребни вакви чувствителни информации, а нивното непотребно споделување може да доведе до неовластен пристап до сметки и злоупотреба на лични и финансиски податоци.
Експертите советуваат корисниците внимателно да размислат кои информации ги споделуваат со вештачката интелигенција, зошто ги споделуваат и како тие би можеле да бидат искористени надвор од првичната намена.
