Со доаѓањето на студените денови, термофорите повторно стануваат чест избор за затоплување и ублажување на болките. Но, лекар предупредува дека нивната употреба може да биде опасна доколку се стари и оштетени, бидејќи постои ризик од пукање и истекување на врела вода.
Д-р Амир Кан, лекар од британската Национална здравствена служба (NHS), предупредува дека термофорите треба да се заменуваат на секои две до три години. Гумата од која се изработени со текот на времето се оштетува поради повтореното изложување на топлина, што може да доведе до пукнатини и сериозни изгореници.
Староста на термофорот може да се провери преку малата кружна ознака на неговиот горен дел. Бројот во средината ја означува годината на производство, додека точките околу него го покажуваат месецот.
Лекарот посочува неколку правила за побезбедна употреба: да се користи топла, но не зовриена вода, термофорот да не се полни повеќе од две третини, да се истисне вишокот воздух пред затворањето и да се провери дали капачето добро затвора и дали има протекување. Исто така, не треба да се поставува директно на кожата, туку да се користи заштитна навлака или пешкир.
Д-р Кан предупредува и на состојбата позната како еритема аб игне, која се појавува по долготрајно изложување на кожата на топлина. Се препознава по црвенкасти промени со мрежест изглед, најчесто на местата каде што редовно се поставува термофорот.
Затоа, пред повторно да го користите, проверете колку е стар, дали има оштетувања и дали правилно го применувате.
