По повеќе од три децении, германскиот производител „Ауди“ го заврши производството на својот луксузен модел А8. Последниот автомобил од актуелната генерација излегол од производствената лента во фабриката во Некарсулм во средината на октомври, објави германскиот магазин „Ауто Мотор унд Шпорт“.
Производството на А8 во оваа фабрика започна во 1994 година. Производствените капацитети што досега беа наменети за моделот ќе се користат за зголемување на производството на А5 и А6.
Иднината на луксузната лимузина подолго време беше неизвесна поради намалената побарувачка за големи седани и зголемениот интерес за луксузни теренски возила. „Ауди“ уште во март 2026 година престана да прима нарачки за А8 во Германија, а неговото повлекување од понудата стануваше сè поизвесно.
Моделот го наследи „Ауди В8“ и повеќе од 30 години беше еден од главните претставници на технолошките можности на компанијата, конкурирајќи им на „Мерцедес-Бенц С-класа“, „БМВ Серија 7“ и „Лексус ЛС“.
Сепак, можно е А8 повторно да се појави околу 2030 година. Според одредени извештаи, се разгледува негово производство во Лајпциг, со користење на платформата на следната генерација „Порше Панамера“. Како друга можност се споменува и соработка со кинеската компанија „Хуавеј“, при што идниот модел би се произведувал во Кина. Засега нема официјална потврда за овие планови.
Крајот на А8 ја отсликува промената на автомобилскиот пазар, каде што големите луксузни лимузини стануваат сè потесна пазарна категорија, додека производителите сè повеќе се насочуваат кон теренските возила.
