Хрватската технолошка компанија „Софаскор“, позната по платформата за следење спортски резултати и статистика, подготвува сопствена социјална мрежа наменета исклучиво за спортот, објави коосновачот и директор за стратегија на компанијата, Иван Бешлиќ.
Новата платформа првично ќе биде достапна во Хрватска, каде што компанијата планира да ги приспособи алгоритмите на потребите на корисниците и подобро да ја контролира несаканата содржина. По почетната фаза, предвидено е нејзино проширување на светскиот пазар.
„Можеме да кажеме дека станува збор за класична социјална мрежа, но не почнуваме од нула, туку со нашите 50 милиони активни корисници“, изјави Бешлиќ во поткаст на „Пословни дневник“.
Како една од причините за создавање на платформата ја посочи желбата љубителите на спортот да споделуваат содржини од натпреварите на мрежа посветена на спортот, наместо да ги објавуваат на постојните глобални платформи.
„Софаскор“ започнал како мал проект во Загреб во 2011 година, а денес има повеќе од 50 милиони активни корисници месечно и е меѓу познатите светски платформи за спортски резултати и статистика. Компанијата ја основале Иван Бешлиќ и Златко Хркач, а според Бешлиќ, бизнисот го развивале без класичен надворешен капитал.
Најголем број корисници има во Бразил и Индонезија, додека во последниот период бележи значителен раст и на американскиот пазар. Компанијата неодамна договорила соработка со Националната хокеарска лига (НХЛ).
Соработката треба да придонесе обемните статистички податоци за хокејот да бидат претставени на поразбирлив начин, по примерот на системот за оценување на играчи што „Софаскор“ веќе го применува во фудбалот и кошарката.
