Кралот Чарлс донел конечна одлука за статусот на принцот Хари и Меган Маркл, кои нема да извршуваат официјални кралски должности ниту ќе учествуваат во јавни протоколи при престојот во Обединетото Кралство.
Ова, според Би-би-си, е наведено во писмо испратено во име на кралот, со кое се дефинира статусот на Хари и Меган по нивното враќање од Калифорнија со децата Арчи и Лилибет.
Во документот се потврдува дека парот и натаму не може да ги користи титулите „Негово“ и „Нејзино Кралско Височество“ (HRH). Во писмото тие се опишани како „приватни граѓани со комерцијални и добротворни интереси“.
Според извори од кралскиот двор, дописот бил испратен до тимот на принцот Хари, Владата, војската и кралските претставници. Со него се прецизира дека идните појавувања на Хари и Меган во Обединетото Кралство ќе бидат исклучиво од приватен карактер и дека тие не ја претставуваат кралската фамилија.
Воедно, со писмото се потврдува дека договорот од Сандрингам од 2020 година останува непроменет. Со него била отфрлена можноста за т.н. хибриден статус, односно истовремено задржување комерцијални интереси и извршување официјални должности за Круната.
„Општо е познато дека во јануари 2020 година војводата и војвотката се повлекоа од претставничките должности во име на суверенот и повеќе не се работни членови на кралската фамилија“, се наведува во писмото.
Во документот се додава и дека нивниот добротворен ангажман е нивна лична работа и дека го спроведуваат во приватно својство.
