Драма на море и здравствена криза ги одбележаа последните денови на луксузниот крузер MV Hondius, кој се најде во центарот на вниманието на светската јавност по избувнувањето на опасниот хантавирус меѓу патниците и екипажот.
Луксузниот крузер, погоден од смртоносно избувнување на хантавирус, кој од неделата беше блокиран крај брегот на Зеленортските Острови, треба денес да тргне кон Шпанија, откако три лица – од кои две во тешка состојба – беа евакуирани.
Бродот MV Hondius, на кој се наоѓаат речиси 150 луѓе, се очекува да пристигне во шпанското пристаниште Тенерифе, на Канарските Острови, во рок од три дена, изјави шпанскиот министер за здравство, додавајќи дека лицата што сè уште се на бродот не покажуваат симптоми на болеста.
„Кога ќе пристигнат на Тенерифе, доколку останат здрави, сите странски државјани ќе бидат вратени во своите земји“, изјави Моника Гарсија на прес-конференција во Мадрид, пишува Ројтерс.
Четиринаесет шпански патници ќе бидат сместени во карантин во воена болница во Мадрид, рече Гарсија. Траењето на карантинот ќе зависи од тоа кога потенцијално биле во контакт со вирусот, додаде таа, напоменувајќи дека инкубацијата може да трае до 45 дена.
Досега три лица починаа – еден холандски пар и германски државјанин.
Вкупно осум лица – вклучувајќи еден државјанин на Швајцарија, кој се вратил дома и се лекува во Цирих – се сомнева дека се заразени со вирусот, од кои три случаи се потврдени со лабораториски тестирања, соопшти Светската здравствена организација.
Јужна Африка потврди дека меѓу жртвите е идентификуван андијски сој на вирусот, кој во ретки случаи може да се пренесува меѓу луѓето преку многу близок контакт.
„Тоа е единствениот (хантавирус) сој за кој е познато дека може да предизвика пренос од човек на човек, но таквиот пренос е многу редок и… се случува само при многу близок контакт“, соопшти Министерството за здравство на Јужна Африка.
Патниците и екипажот сега очекуваат безбедно пристигнување во Шпанија и понатамошен развој на ситуацијата, додека здравствените власти внимателно го следат текот на настаните за да спречат ширење на заразата.
