Еден Renault 5 TL од 1982 година, кој повеќе од четири децении бил оставен во гаража и поминал само 12 километри, неодамна бил продаден на аукција во Франција за неверојатни 53.711 евра.
Автомобилот го купила Французинка во октомври 1982 година во салон на Renault во Шалон-сир-Сон. Во тоа време за него платила 40.000 француски франци, што денес би изнесувало околу 16.500 евра.
Станува збор за модел со пет врати, 1,1-литарски бензински мотор, четиристепен рачен менувач и металик сина боја.
Причината поради која автомобилот практично не бил возен е необична. Жената во моментот кога го купила немала возачка дозвола, па автомобилот веднаш бил сместен во гаража. Иако подоцна положила возачки испит, никогаш не стекнала доволно самодоверба за редовно да го користи.
Кога годинава бил пронајден, бројачот и понатаму покажувал само 12 километри. На автомобилот сè уште биле поставени и старите црни француски регистарски таблички.
По темелното чистење и подготовката за продажба, Renault 5 бил понуден на аукција организирана од куќата Aguttes во Париз. Иако не станува збор за ретките верзии Turbo или Alpine, неговата извонредна зачуваност и речиси нултата километража привлекле голем интерес кај колекционерите.
Наместо очекуваната скромна цена за обичен примерок, автомобилот на крајот достигнал 53.711 евра.
Денес овој Renault 5 се смета за исклучително добро зачуван примерок од легендарниот француски модел – автомобил кој 43 години речиси и да не ја напуштил својата гаража.
