И покрај бројните предизвикувачки улоги во неговата кариера, Леонардо ди Каприо посебно го издвојува филмот „Повратник“ од 2015 година, кој го опишал како најтешкиот проект на кој работел. Снимањето претставувало голем физички и психички предизвик за актерот.
По светската слава што ја стекна со „Титаник“, ди Каприо постепено избираше улоги со кои сакаше да ја покаже својата глумечка разновидност и да се оддалечи од имиџот на холивудски миленик. Во периодот од 2010 до 2015 година настапи во низа успешни филмови, меѓу кои „Затворен остров“, „Почеток“, „Големиот Гетсби“, „Волкот од Волстрит“ и „Повратник“.
Токму последниот филм му донел искуство какво што дотогаш не доживеал. Ди Каприо во интервју за магазинот „Wired“ во 2015 година објаснил дека режисерите Алехандро Гонзалес Ињариту и Емануел Лубецки имале јасна замисла снимањето да се одвива со природна светлина.
„Со месеци однапред се подготвувавме и вежбавме, но секој ден беше како изведување театарска претстава. Секој актер и секој дел од сценографијата мораше да функционира совршено, бидејќи камерата постојано се движеше, а времето за снимање со природна светлина беше ограничено на само два часа“, раскажал актерот.
Тој искуството го опишал како најблиско до целосно потопување во природата, но и како искушение какво што никогаш претходно не доживеал.
„Секој ден од снимањето на овој филм беше тежок. Тоа е најтешкиот филм што сум го снимил. Кога ќе го погледнете, ќе видите колку издржливост беше потребна од сите нас и колку таа јасно се гледа на екранот“, изјавил ди Каприо.
Со овој филм актерот дополнително ја зацврстил својата позиција меѓу најзначајните холивудски имиња, а искуството од снимањето останало едно од најисцрпувачките во неговата кариера.
