Словенечката престолнина Љубљана е добитник на престижната награда на Creative Tourism Awards, каде што е избрана за „најдобра креативна градска дестинација“ за 2026 година.
Градот е пофален за интегрирањето на креативноста во својот идентитет, туристичка стратегија и долгорочен урбан развој, како и за богатата понуда на креативни настани и соработка со локални уметници, пренесува Euronews.
Наградите, организирани од непрофитната мрежа Creative Tourism Network, оваа година ги оценија 223 кандидати од 28 земји, а победата ѝ припадна на Љубљана.
Градовите, како што наведува Time Out, се незамисливи без креативност – низ Европа сѐ почесто напуштени објекти се претвораат во културни центри, јавни простори стануваат сцени за уметнички инсталации, а парковите оживуваат со летни фестивали.
Љубљана нуди повеќе културни квартови, меѓу кои се издвојуваат Сотеска, каде што се одржува Open Resilience Festival, како и Шишка, позната по малите галерии, музеи и уметнички ателјеа.
Меѓу најпосетуваните атракции е и Музејот на современа уметност Метелкова, сместен во поранешни воени касарни, со колекција што опфаќа дела од 1960-тите до денес. За пошироката публика интерес предизвикува и Куќата на илузии, која нуди интерактивни содржини со холограми и оптички илузии.
Градот нуди и богата фестивалска програма, меѓу кои се издвојува LUV фестивалот, со опера, танц, работилници и бројни изложби и концерти.
